LA CROSE DEL ASINO
Ciàcole 1993/2008- Jornal ' O Serafinense'.
Quando Gesu ga desmontà del asinelo che lo ga portà triunfante
a Gerusalem, el ga domandà - cosa vuto a cambio de la fadiga
che te me ghè risparmià?
L' asino, che ze na bèstia umile e modesta, ga domandà:
-Dassame un segno che te go portà in triunfo.
E lora Gesù ga fato un segno su la schena del asino, 'na
crose, che fin in giorno de ancoi se pol veder.

JÒ E LA ARTE(Giobe)
Ciàcole 1993/2008- Jornal ' O Serafinense'.
Giobe per le arte del diaolo 'l zera reduto a la miseria a tal punto che nol
gavea pì gnente e, par scaldarse el se sentea zo vissin a le stale, proprio
'ndove ghe zera el letame, vissin a le paie del formento. So corpo
zera pien de piaghe e vermi, ma ancora cossita el ga mia perso
la fede in Dio.
I vermi i zera diventai tanti ma tanti che i caschea par terra e
Giobe, con passiensa, i li metea sora 'na pianta che zera li
vissin.
-Vegni, care, anche valtre si fiole de Dio.
E ze stà cosi che dal ciel, tocà de tanta virtù,
Dio ga fato i vermi abandonar Giobe e 'ndar tuti su la pianta
e li i ga scomissià a filar bossoleti de oro. Zera la seta che
Giobe ga imparà a laorar e lu, lora, el se ga fato pì rico de prima.
Quando el ze morto el ga dassà ai omini, oltre l'esempio
de passiensa e fede, una nova arte: la seta.

SAN MARTIN
Ciàcole 1993/2008- Jornal ' O Serafinense'.
Martin, prima de esser vescovo 'l zera un omo de arme e brigante, e ancora
giovane el ga fato laori per la guarnission lontana, quatro giornade a caval.
Martin ga partio ben coerto, com un mantelo perchè zera belche scomissià el fredo.
Martin no gavea fato gnanca ora de scomissiar el so camin quando 'l ga visto un poareto sensa
roba che domandea aiuto par no morir de fredo.
San Martin zera generoso, e nol ga mia bio dubio de ciapar
la spada e taiar par meso 'l so mantelo dando metà al poareto.
Va par un bon toco de strada e cata un altro poareto, morto de fredo,
e sensa pensarghe due volte, Martin se tira zo el mantelo
e lo da al poareto, lora da lì in vanti el batea i denti del fredo.
Ma el Segnor el ga visto la virtù de sto omo,el ga tira indrio le nuvole. e 'l ga fato
vegner fora el sol e l' aria se ga fato manco freda come se fosse
'na bona staion.
Par tuto
'el tempo del so viaio, Martin ga bio el bon tempo
de compagnia, fin rivar al so destin. Par questo che el Segnor,
par ricordar de San Martin, tuti i ani 'l ripete questi trè giorni
con un pochetin, de caldo, che ze el tempo che ga durà el viaio de
San Martin.