LE TRADISSION DE NATAL DEI NOSTRI IMIGRANTI.

Ricordar ze viver. El Natal el ze el giorno de ‘l imigrante italiano, un gran giorno.
Giorno de meter òrdine te la pròpria vita spiritual. Giorno de confession, comunion
e messa. Giorno de scomissiar tuto un’ altra volta. Giorno de vardar in sù, le stele,
la luna e ‘l sol, l’ intero ciel par saver come sarà le piantassion. Quando se piantea
el formento e se gavea ‘na note bela e piena de stele, i piantava tanto parché lora
volea dir che el formento no ciapea niente de malatie e vegnaria in abondansa.
Natal sensa rinovar la vita cristiana nol zera mia Natal. Catòlichi conviti, i imigranti
i proveitèa el tempo de Natal no solche par rinovar la vita spiritual sua, ma anca par
 trovarse coi amissi, far novi amissi e mantegnerse ben con tuti. La stela de Natal la
‘ndea in giro fin la Epifania, de casa in casa, quando le faméie le se catea davanti ste
case e le cantea e preghea, e dopo i bevea zo vin e i magnea i famosi grustoli.
El Dio de amor el vol che se dasse de aver invidia, rabia e ste cose del mal...
El vol che le persone le possa capirse par darghe posto al perdon e a la passe.
Una cassa, una scarpa, un sestel drio la porta ghin dava la sicuressa de che el bambin
vegnaria con cose bone par i pìcoli tosatèi, parché par Cristo, i tosatèi i vien par primo posto.
Ma se gavea de vinser la coriosità e ‘ndar dormir bonora, sensa spionar parché sinò tuto
‘ ndaria a ramengo. La mesa note, dopo che i tornea da messa, e a la matina bonora,
i tosatèi i zera desmissiai e i rissevea i regali che i spetea, pochi e pìcoli ma che i gavea
un gran valor parché i zera portai dal Signor Gesù, adesso Bambin anca lù.
Dopo i sufiea in te na foia de naransera, o de qualche pianta, e i cantea Gloria in Excelsis Deo,
proprio co la foia, che se someiea a un strumento pròprio fato par sonar in quel giorno.( Frei Rovilio Costa)

BON NATAL!
Ciàcole 1993/2008- Jornal O Serafinense
Vien Natal con tanti ricordi de un mondo lontan e vissin.
Vedemo face, sentimo ose e ‘ na musica dolse: se ricordemo de canti de Cesa, de scola, quei insegnài par la mama...
Mi, a volte, me  par de sentirme in meso a ‘na nebia,come un fumo che vien e che va. Zelo un Natal fiaco? No, parché gavemo catá forsa par far grandi e novi Natali e pì de tuto, Dio 'l ga permesso che noantri restàssimo tuto sto tempo sensa cavar via le nostre radise.
E de tute storie che gavemo sentio, che gavemo imparà, se le portemo  tute insieme, te la casseta dei ricordi, faremo che sta lusse la sia bona far ciaro anca sto ano, tel  Natal de tuti. Ben,che tuti i ani el torne a farne sentir come putèi, come tosatèi, e che proemo sempre esser pì boni con tuti, a ‘ver passiensa, a spetar che tuto sia bon, e che semo degni anca de dir a tuti valtri, de piena ose: Bon Natal e Bon Ano!

BON NATAL E BON ANO!
Ciàcole 1993/2008- Jornal O Serafinense
Prima de tuto zera el LOGOS, grande passo Biblico su la teoria de la Criassion e de le origine. Tuto se stà basà su Dio/Parola. E par meso de la parola, i ómeni i gà trasmesso e tramandà tuto: stòria, valori, conquista e sentimenti.
Noantri, adesso che scomissia  el novo ano, spetemo anca de portarve, traverso la parola scrita, qualcosa cossì bona, come la speransa de la passe che camina ancora nel cuor dei òmeni.
Che Dio el possa esser lusse te la vita de tuti, e in tuti i giorni del novo ano.
Aver Cristo in questi giorni ze la pì granda motivassion . Le ombre che tante volte le par coerser la nostra vita, no le pol mia far ´ndar via la forsa e la fede che gavemo rento, parché gavemo sta sicuressa de che Gesù el ze la nostra lusse, verità e vita. E par ´ver passe te la nostra vita, prima de tuto ze bisogno che la portemo rento noantri .
Che Dio Bambin porte a tuti un Ano Novo de lusse, con molta salute e passe.