Data: 1993
Para ‘Ciàcole’- Jornal Serafinense
Localidade: Serafina Corrêa, Evangelista, Silva Jardim, Guaporé, Dois Lajeados,
São Valentin, Santa Bárbara..
 

EL TOROTOTELA
El zera un omo che ´ndea in giro par tute le contrà de le cità, coi so strumenti
costruiti da lì ( una suca voda che ‘l batea come se fosse un tamburo), e campaneli.
 Sora le spale el gavea i puàtoli de legno, e lù, tirando i spaghi, i fea mover le gambe e i brassi.
El Torototela nol ´ndea sol ne le Sagre, el girea de casa in casa, coi so canti, e zera na gran festa par u putèi scoltar. I spalanchea i òci e i versea  la boca parché zera na  gran festa a domissilio.
Dopo la esibission, el Torototela el slongava la man e le femene le ghe metea un toco de salame, un par de fete de polenta, quela dura, bona, che savea de brustolin.
El Torototela el magnea e contea a quei che i zera intorno, le storie de fate, gnomi, e tuti lì intorno i sbrissiava fora de la realtà.
Ve scrivemo desso, alcune version de le antiche cante del Torototela, sicuri che interessarà  i veci e anca i giovani.

 

CANTO DE LA TOROTOTELA

L’è rivà el Torototela
L’ è rivà el Torototà.
L’ è rivà el Torototela
L’è rivà el Torototà.

Son trè giorni che camino
Par venirla a ritrovar,
Son el povero Torototela
Son el povero Torototà.
 
Siora parona, me fago avanti
Par venir a domandar
Son el povero Torototela
Che domanda la carità.
 
La varda ne la credensa
Che calcossa la trovarà
Son el povero Torototela
Son el povero Torototà.

La varda el baldachin
E la taia un salamin,
Son el povero Torototela
Son el povero Torototà.

Se polenta o pur farina
La me daga volontiera
Son el povero Torototela
Son el povero Torototà.

A la ringrassio tanto, tanto
Che nantr’ ano son ‘ ncora quà
Son el povero Torototela

Son el povero Torototà

A Nadal i tosi cantava la ciarastela in giro par le case e tuti o quasi tuti i se ricorda. A marso ghe zera  l’usansa de sbater la primavera.I tosi i ciapava pignate e i ndea in giro fasendo un bacan de mati. A carnaval i ndava in giro cantando Torototela, parché le femene ghe desse qualcosa par far le fritole..

Da notar che el  Torototela, in un altra version el zera cantà par le sagre, da vagabondi che i gavea  i puoti de legno che se movea tirando el spago. I boce o la gente grande se divertia a vardar sti puoti moverse e cossita el Torototela ciapava qualche scheo.