Tempo- Taibon Agordino-BL   
           
Go tolto in man
un pugno de quela terra,
forse quela che ‘l nono coltivea,
e la go portada a casa.
Parchè son ‘ndà nel paese mio, Taibon,
vissin a le nuvole del ciel
che incapussa le me montagne
e le impissa de un color de ànima
e le fa brilar come ‘l cuor
de sti vèci che i ze vignesti via.
E ogni passo che fea
indrio me voltavo
par veder, se svelta,
qualche man la me tirava
par dirme:
Ciò, fiola,
cossa feto quà
adess  che  ‘l mondo
ga fato un giro tondo
e nel ciel
un fasso de candele
gavemo impissà?
Go tolto in man
un pugno de quela terra,
coi so sogni robài
che el tempo sparisse.
E l’odor de sta terra pestà
lo go portà insieme
par combater el dolor
de la me casa voda.


To òci

Me fa paura sti giorni
de sogni rancurai
nei to òci matine.
Te podarissi imbriagarmi
coi to òci
e intanto
no te me ghè donà
gnanca ‘na caressa.
A mi...
A mi che gavaria spacà el muro
co un sol fià de ombra.
Che gavaria robà
el respiro dele foie
par donartelo insieme al dì.
Che te parlaria de amor
e de tòchi de ciel
e de angeli
che sbassa le ale
par ciapar i veli
e cunarli
nele giornade sgionfe de istà.
A mi...
A mi che te vardo da lontan
rodolando col silensio
che ghe ze
fra i to òci e la parola,
sto gropo nel cuor.
Sensa nessun...Sensa nessun...